السلام عليكم و رحمة الله و بركاته
النهاردة هاتكلم عن نشاط سلة الكنز و ده من امتع انشطة منتسوري الى الطفل بيحبها.
ايه هو نشاط سلة الكنز؟
هو سلة بتجمعي فيها اي حاجة ممكن الطفل يستكشفها..مجموعة العاب..ادوات منزلية..حاجات بخامات مختلفة و ملمس مختلف..حاجات بلون واحد او الوان مختلفة...حاجات تتاكل..حاجات تتشم..حاجات بتصدر صوت...و بنديها للطفل يستكشفها
طيب ليه اسمه سلة الكنز؟
لأن كل محتويات السلة بتكون جديدة على الطفل فبيكون بالنسبة له زي الكنز الى بيكتشفه بنفسه
كيفية تقديم نشاط سلة الكنز؟
بنجيب السلة و نحطها على سجادة العمل او المكان الى الطفل جالس فيه و نبدأ نطلع حاجة حاجة من السلة و نورى الطفل يستكشفها ازاى..يعنى نلمسها بايدينا الاول..نهزها ..نشمها..ندوقها و هكذا و بعدين نسيبها
بعد كده يجي دور الطفل و يبدأ هو ياخد اى حاجة من السلة و يبدأ يستكشفها هو كمان
متى نقدم نشاط سلة الكنز؟
بنقدمه اول ما الطفل يبدأ يقعد مسنود كويس و يبدأ يمد ايده علشان يمسك الأشياء
يعنى النشاط ده ممكن يبدأ من اربع أو خمس شهور و بيستمر مع الطفل وقت طويل و لكن بتغييرات في كيفية اداء النشاط
ايه الفائدة من النشاط ده؟
هو في المقام الأول نشاط حسي و بينمي جميع المهارات الحسية على حسب محتويات سلة الكنز
يعنى بينمى حاسة اللمس لما احط في السلة حاجات بملمس مختلف زي ناعم و خشن و طري و ناشف و مجسمات مختلفة
بينمي حاسة البصر اما احط فيه مجموعة اشياء بنفس اللون مثلا لونها أحمر..أو احط اشياء الوانها مختلفة
بينمي حاسة السمع اما احط في السلة أشياء تصدر اصوات مختلفة ..مثل انواع مختلفة من خشخيشات الاطفال
بينمي حاسة التذوق أما نحط في السلة بعض الأطعمة ذات المذاقات المختلفة
بينمي حاسة الشم اما نحط في السلة أشياء ذات روائح مختلفة
تغيير محتويات السلة
يجب كل عدة ايام ان نغير محتويات سلة الكنز علشان الطفل ميملش منها و تفضل تجذب انتباهه لأطول فترة ممكنة
تطبيقي لنشاط سلة الكنز مع جنى
بدأت أقدم السلة لجنى اما كملت تقريبا خمس شهور و فعلا عجبها و لفت انتباهها و بتقضي مع السلة وقت مش قليل..و دي من الأنشطة شبه اليومية الي بنطبقها
طبقنا سلة الكنز لمجموعة أدوات معدنية..لونها موحد..و كمان بتصدر صوت لما بتخبط في بعضها
و دي سلة الكنزلأشياء مختلفة باللون الأحمر
و دي سلة كنز لحاسة التذوق حطيت لها فيها أشياء بطعم مختلف
دي سلة الكنز لأشياء ذات رائحة مختلفة ..عبارة عن اكياس اورجانزا بها نعناع و حبهان و بخور
و دي سلة فيها بعض العاب جنى بالوان مختلفة و بتصدر أصوات مختلفة
و السلام عليكم ورحمة الله وبركاته
زوجة وأم وصيدلانية مهتمه بالتربيةوالتعليم بنظام منتسوري .. ، ، ،
